கொரோனாவும் கடந்து போகும்!

கொரோனா வைரஸ் என்ற கொடிய வைரஸ் பற்றி வேண்டிய அளவு கேள்விப்பட்டு விட்டோம். அந்த வைரஸ் உலகில் பல லட்சக்கணக்கான மக்களைப் பாதித்தும் ஆயிரக்கணக்கான மக்களின் உயிரைப் பறித்தும் விட்டது. அது ஏற்கெனவே பரவி விட்டிருப்பதன் விளைவுகளை இனி சில நாட்களில் உச்சத்தில் நாம் உணர வேண்டியிருக்கும் என்று நிபுணர்கள் சொல்கிறார்கள். இந்த நோயின் தன்மை பற்றியும், நாம் அலட்சியப்படுத்தாமல் மேற்கொள்ள வேண்டிய தற்காப்பு நடவடிக்கைகள் பற்றியும் நானும் ஒரு நீண்ட கட்டுரை எழுதியிருந்தேன். ஏனென்றால் இது அலட்சியப்படுத்த வேண்டிய விஷயமல்ல.

ஆனால் டிவி சேனல்களைப் போட்டால் அங்கு கொரோனா கொடூரம், பத்திரிக்கைகளைப் பிரித்தால் கொரோனா புள்ளிவிவரங்கள், வாட்சப் திறந்தால் கொரோனா கொடுமை, தீர்வுகளாகப் பாட்டி வைத்தியம் உள்ளிட்ட பல வைத்தியங்கள் என்று எல்லா ஊடகங்களும் கொரோனாவைத் தவிர வேறொன்றும் சொல்வதில்லை, பேசுவதில்லை என்று சங்கல்பம் செய்து கொரோனா மேனியாவை உச்சத்தில் கொண்டு போய் விட்டிருப்பது கொரோனாவைக் காட்டிலும் கொடுமையாக இருக்கிறது.

பிரச்சினையின் தீவிரம் சாமானியனுக்குப் புரிய வேண்டும் என்பதிலும் அவன் தற்காத்துக் கொண்டு சமூகத்தையும் காக்க உதவ வேண்டும் என்பதிலும் இருவேறு கருத்தில்லை. ஆனால் சகட்டுமேனிக்குப் பயமுறுத்துவதும், திகிலூட்டுவதும், அதைப் பற்றியே பேசிக் கொண்டிருப்பதும் இந்தப்  பிரச்சினையைத் தீர்த்து வைக்காமல் கூட்டவே செய்யும்.

பிரச்சினைக்காலங்களில் தீர்வு நோக்கியே மனிதனின் கவனம் இருக்க வேண்டுமேயொழிய பிரச்சினையின் தீவிரம் நோக்கிய பீதி, புலம்பல், கவலை ஆகியவை மேலோங்கி விடக்கூடாது. தற்காப்பு நடவடிக்கைகளும், அறிவுபூர்வமான அணுகுமுறைகளும், தன்னம்பிக்கையும், இறை நம்பிக்கையும் இருக்க வேண்டுமேயொழிய எத்தனை பேர் எங்கெல்லாம் செத்தார்கள், எப்படி பரவிக் கொண்டிருக்கிறது என்று அடிக்கடி சாவு நிகழ்வுகளை நாம் அப்டேட் செய்து கொண்டிருக்கக்கூடாது.

ஆழ்மனசக்தி குறித்த இரண்டு ஆராய்ச்சி நூல்களை எழுதியிருக்கும் அனுபவத்தில் சொல்கிறேன். நோய்க்கிருமி ஒருவனைக் கொல்லுமா, பாதிக்காமல் நீங்குமா என்பதை நிர்ணயிப்பது மனித உடலில் உள்ள நோய் எதிர்ப்பு சக்தி தான். நோய்க்கிருமியை விட நோய் எதிர்ப்பு சக்திகள் வலிமை கூடி இருந்தால் நோய்க்கிருமி தாக்கினதே கூடத் தெரியாமல், பாதிப்பே இல்லாமல் தப்பி விட முடியும்.  அந்த நோய் எதிர்ப்பு சக்திகளை உச்சத்தில் வைத்திருக்க வேண்டியதே ஒவ்வொரு மனிதனின் அதிமுக்கிய கடமை.

சதா நோயின் தீவிரங்களைப் படிப்பதும், பேசுவதும், பார்ப்பதும் நோய்க்கிருமி குறித்த பிரம்மாணடமான உணர்வை ஏற்படுத்தி நம்மைப் பலவீனப்படுத்தி விடும் என்பதே ஆழ்மனசக்திகளைப் பொறுத்த வரை மகத்தான உண்மை. நம்மிடம் இயற்கையாக உள்ள நோய் எதிர்ப்பு சக்தியை ஆழ்மன அளவில் இந்த நோய் குறித்த தொடர் கவனம் குறைக்க ஆரம்பித்து விடும். நாமே நம் மனதில் ப்ரோகிராம்கள் எழுதிக்கொண்டு அந்த ப்ரோகிராம்களை மெய்யாக்கி விடும் அபாயம் இது போன்ற சமயங்களில் ஏற்பட்டு விடும். எந்த நோய் பற்றியும் தீவிரமாக ஆராயப்போனால் எந்தக் கொடிய நோய் பற்றிய அறிகுறிகளைப் படித்தாலும் சில அறிகுறிகள் நமக்கும் இருப்பதாகவே எவருக்கும் தோன்றும். இப்படி நோய் தாக்கி பாதிக்கப்படுவதை விட நோய் பயத்தினால் பாதிக்கப்படுபவர்கள் அநேகம் பேர்.

இந்தக் கொரோனோ பாதிக்கப்பட்டவர்களில் கூட மிகக்குறைவான சதவீதம் பேர் தான் மரணமடைகிறார்கள். மீதியிருக்கும் பெரும்பாலான மக்கள் மீண்டு தேறிவிடுகிறார்கள். உண்மை நிலைமையைச் சொல்கிறோம் என்று பரப்புரை செய்பவர்கள் இந்த உண்மையை மறந்தும் வலியுறுத்திப் பேசிவிடாமல் இருப்பது என்ன தர்மமோ தெரியவில்லை.   

மீடியாக்கள் எல்லாத் துயரங்களிலும் காசு பார்ப்பவர்கள். விழிப்புணர்வு ஏற்படுத்துவதாகச் சொல்லிக் கொண்டு பதற வைக்கும் செய்திகளை ஒருவரை ஒருவர் முந்திக் கொண்டு தருவார்கள். அது அவர்கள் பிழைப்பு. ஆனால் அறிவுள்ள மனிதர்கள் நிலைமையின் தீவிரத்தைப் புரிந்து கொண்ட பின்னர் அடிக்கடி அதிலேயே கவனம் செலுத்துவது தவறு. அந்தப் பயமே ஆழமானால் நம் இயல்பான நோய் எதிர்ப்பு சக்தியைக் குறைத்து விடும். இந்த முக்கிய நேரத்தில் அப்படியாகிவிட நாம் அனுமதிக்கக்கூடாது.  

உலகம் எத்தனையோ இயற்கை அச்சுறுத்தல்களைச் சந்தித்திருக்கிறது. இழப்புகளைச் சந்தித்திருக்கிறது. ஆனால் எல்லாவற்றிலும் அது மீண்டே வந்திருக்கிறது. நம் உடலும் அப்படித்தான். எத்தனையோ நோய்க்கிருமிகளை தினந்தோறும் சந்தித்து வருகிறது. பாதிக்கப்பட்டாலும் அதிலிருந்து மீண்டு கொண்டே வருகிறது. எதற்கும் பயம் தீர்வாகாது. கவலையும் தீர்வாகாது. கவனமாக இருப்போம். பொறுப்புடன் நடந்து கொள்வோம். அதற்கு மேல் நாம் செய்வதற்கொன்றும் இல்லை. கொரோனாவும் கடந்து போகும்! இது சத்தியம்!

என்.கணேசன்

கொரோனா வைரஸ் தாக்கத்திலிருந்து பாதுகாத்துக் கொள்வது எப்படி?

டிசம்பர் 2019ல் சீனாவில் உருவான கொரோனா வைரஸ் (COVID-19) இன்று மற்ற உலக நாடுகளுக்கெல்லாம் பரவி உலக மக்கள் அனைவரையும் அச்சுறுத்திக் கொண்டிருக்கிறது. அதற்கு இன்னும் அதிகாரபூர்வமான மருந்து கண்டுபிடிக்கப்படாத நிலைமையில் ஊடகங்களில் பலரும் பலவிதமான பயமுறுத்தல்களையும், வைத்தியங்களையும் பரப்பி குழப்பங்களையும், பீதியையும் மக்களிடையே உருவாக்கிக் கொண்டிருக்கிறார்கள்.

நமக்கு வந்தவண்ணம் இருக்கும் ஏராளமான தகவல்களில் எத்தனை உண்மை, எத்தனை பொய், எத்தனை அவசியம், எத்தனை அனாவசியம் என்று நமக்குக் குழப்பமாக இருப்பதில் ஆச்சரியமில்லை. இது குறித்து உலக சுகாதார நிறுவனம் சொல்லும் தகவல்களில் மிக முக்கியமான, அடிப்படையாய் அறிய வேண்டிய தகவல்களை மட்டும் எளிமையாகவும் சுருக்கமாகவும் உள்ளது உள்ளபடி பார்ப்போம்.

அறிகுறிகள் என்ன?

காய்ச்சல், களைப்பு, வறட்டு இருமல், மூக்கடைப்பு, மூக்கு ஒழுகல், தொண்டை வலி, பேதி ஆகியவை. இவை ஆரம்பமாகி அதிகரித்துக் கொண்டே செல்வது தான் கொரோனாவின் தனித்தன்மையாக இருக்கிறது. உடலுக்குள் நுழைந்த பின் இரண்டு வாரங்கள் வரை இருக்கும் இந்த வைரஸ் பொதுவாக ஐந்து நாட்களுக்கு மேல் தான் அதிகமாய் பாதிக்க ஆரம்பிக்கிறது.

குணமாகுமா?

பாதிக்கப்படுபவர்களில் ஐந்து அல்லது ஆறு பேரில் ஒருவர் தான் மிகவும் கடுமையாகப் பாதிக்கப்பட்டு உயிரிழக்கும் நிலவரம் தற்போது இருக்கிறது. மிக வயதானவர்கள், நோயெதிர்ப்புசக்தி குறைவானவர்கள், முன்பே பல நோய் பிரச்சினைகளின் காரணமாகப் பலவீனமாக இருப்பவர்கள் தான் உயிரிழக்கும் அபாயம் இருக்கிறது. மற்றவர்கள், அதாவது சுமார் 80 சதவீதம் பேர், இரண்டு வாரங்கள் கழித்து மெள்ள குணமடைய ஆரம்பிக்கிறார்கள்.

ஆண்டிபயாடிக் மருந்துகள் இந்த வைரஸிலிருந்து பாதுகாக்காது என்கிறார்கள். பலர் சொல்லும் இயற்கை மருத்துவமும் முழுவதுமாக உடனடியாகக் குணப்படுத்தும் என்பது உறுதிப்படுத்தப்படவில்லை.

பரவுவது எப்படி?

முக்கியமாகவும், அதிகமாகவும் பரவுவது பாதிக்கப்பட்டவர்களின் இருமல் மற்றும் தும்மலாலும் தான். அந்தச் சமயங்களில் பாதிக்கப்பட்டவர்களிடமிருந்து தெறிக்கும் நீர்த்திவலைகள் அடுத்தவர் கையில் படநேர்ந்து, அவர்கள் கையால் வாய், மூக்கு, கண்களைத் தொட்டு அந்த வகையில் அவர்கள் உடலுக்குள்ளும் அந்த வைரஸ் பிரவேசிக்கிறது. பின் பாதிக்கிறது. மற்ற வகையில் இந்த கொரோனா வைரஸ் பரவுவதற்கு வாய்ப்பு மிகவும் குறைவு என்கிறார்கள்.

பாதுகாத்துக் கொள்வது எப்படி?     

இந்த வைரஸ் நம் உடலுக்குள் நுழைய முடிவது நம் கைகள் மூலமாகத் தான் என்பதால் கைகளை அடிக்கடி நன்றாகச் சோப்பு போட்டுக் கழுவிக் கொள்வது முக்கியமாகக் கருதப்படுகிறது. ஆல்கஹால் கலந்த சானிடைசர்கள் வைரஸ்களை அழிக்க முடிந்தவை என்பதால் அவற்றைக் கைகளில் தடவியும் நாம் நம்மைப் பாதுகாத்துக் கொள்ளலாம்.

கைகளைக் கழுவாமல் வாய், மூக்கு, கண்களுக்குக் கொண்டு செல்லக்கூடாது.

இருமும் அல்லது தும்மும் மனிதர்களிடமிருந்து குறைந்தபட்சமாக நான்கடிகளாவது தள்ளி நிற்பது நல்லது. ஐந்தாறு அடிகள் தள்ளி நிற்பது நல்ல பாதுகாப்பு.

கைகுலுக்குவதைத் தவிருங்கள். அதற்குப் பதிலாகக் கைகூப்பி வணக்கம் தெரிவியுங்கள்.

இந்த வைரஸின் தாக்கம் தணியும் வரை பலர் கூடும் பொது இடங்களுக்குச் செல்வதைத் தவிர்ப்பது உத்தமம்.

எந்தெந்தப் பகுதிகளில் இதன் தாக்கம் அதிகமாக இருக்கிறது என்பதை அறிந்து அந்த இடங்களுக்குச் செல்வதையும் முடிந்த வரை தவிருங்கள்.

மாஸ்க்குகள் அவசியமா?

இந்த வைரஸால் பாதிக்கப்பட்டிருந்தாலோ, பாதிக்கப்படுபவர்களுடன் நெருங்கியிருக்க வேண்டிய சூழலில் இருந்தாலோ (மருத்துவர்கள், நர்ஸ்கள், உடனிருக்கும் உறவினர்கள்) மாஸ்க்குகள் அணிவது அவசியம். அது நோய்க்கிருமிகளை மற்றவர்களுக்குப் பரவாமல் தடுக்க உதவும். மற்றவர்கள் அணிய வேண்டிய அவசியமில்லை.

இப்படிப் பரவாது

பாதிக்கப்பட்டவர்களிடமிருந்து காற்றில் பரவாது. அவர்கள் இருந்த இடத்திற்குச் சிறிது நேரம் கழித்துச் செல்வதாலோ, அவர்கள் பயன்படுத்திய பொருள்களை உலர்ந்த நிலையில் பிறகு நாமும் பயன்படுத்துவதாலோ இந்த வைரஸ் தொற்றிக் கொள்ள வழியில்லை என்று நிபுணர்கள் சொல்கிறார்கள். பாதிக்கப்பட்டவர்கள் இருக்கும் இடத்திற்குச் சென்றாலும் கூட, பாதுகாப்பாகத் தொலைவில் இருக்கும் வரை பயப்பட வேண்டியதில்லை.

பயம் எதற்கு?

கொரோனா வைரஸ் பரவும் வேகம் தான் இப்போது அனைவரையும் பயப்பட வைக்கிறது. பாதிக்கப்படும் நபர்களில் இருபது சதவீதம் ஆட்கள் இறக்கவும் கூடும், மீதி ஆட்கள் மூலம் இந்த வைரஸ் அதிவேகமாகப் பரவவும் கூடும் என்கிற நிலைமை நம் நாட்டைப் போன்ற மக்கள் தொகை அதிகமாக உள்ள நாடுகளில் அச்சத்தை ஏற்படுத்துவது இயல்பே. எனவே நாம் நம்மைப் பாதுகாத்துக் கொள்ளவும், அடுத்தவர்களுக்குப் பரப்பாமல் இருக்கவும் கடமைப்பட்டிருக்கிறோம்.

வந்து விட்டால் என்ன செய்ய வேண்டும்?

கொரோனா வைரஸ் பாதிப்பின் தன்மைகள் தெரிந்தால் உடனடியாக மருத்துவ உதவியை நாட வேண்டும். பின் நம்மைக் குணப்படுத்திக் கொள்ளும் அனைத்து ஏற்பாடுகளையும் மேற்கொள்ள வேண்டும். அதோடு நம் மூலமாக அடுத்தவர்களுக்குப் பரவாதபடி நாம் தனிமையில் இருக்க வேண்டும். தவிர்க்க முடியாமல் தொடர்பு கொள்ள வேண்டியிருந்தாலும் எட்டி இருந்து எந்த வகையிலும் மற்றவர் பாதிக்கப்படாதபடி பார்த்துக் கொள்வது முக்கியம்.

முக்கியமாக இருமும் போதோ தும்மும் போதோ நீர்த்திவலைகள் தெறிக்காதபடி கைக்குட்டையால் மறைத்துக் கொள்வது மிக அவசியம்

பயணம் போவதோ, ஆட்கூட்டத்தில் சேர்வதோ கூடவே கூடாது. மிக நெருக்கமாக இருக்கையில் மற்றவர்களூக்கும் தொற்றிக் கொள்ளும் வாய்ப்புகள் அதிகமாக இருப்பதால் அதைக் கண்டிப்பாகத் தவிர்க்க வேண்டும்.

பாதிக்கப்படுபவர்கள் வெகுசிலராக இருக்கும் வரை தான் அரசாங்கமும் தனிமைப்படுத்தி குணப்படுத்த முடியும். ஆயிரக்கணக்கில் ஆகி விட்டால் அதற்கான வசதியும், இடமும் இங்கு கிடையாது என்பதை நாம் மறந்து விடக்கூடாது. எனவே பரவாமல் தடுக்க வேண்டிய மிகப்பெரிய பொறுப்பு நம் அனைவருக்கும் உள்ளது.


சமூக விலகல் ஏன் முக்கியம்?

கொரோனா வைரஸால் பாதிக்கப்படுபட்டவர்களுக்கு அறிகுறிகள் தெரிய ஆரம்பிக்க சுமார் ஐந்து நாட்கள் வரை ஆகலாம். ஆனால் தெரிய ஆரம்பிப்பதற்குள் ஒவ்வொருவரும் எத்தனையோ பேருக்குப் பரப்பிவிட வாய்ப்பிருக்கிறது. அந்த ஒவ்வொருவரும் அவர்களுக்குத் தெரிய ஆரம்பிப்பதற்குள் மற்றவர்களுக்குப் பரப்பிவிடவும் வாய்ப்பிருக்கிறது. இப்படி ஒருவரால் சில நாட்களில் பல்லாயிரம் பேர் பாதிக்கப்படும் அபாயம் இருப்பதால் நலமாய் இருப்பதாய் நினைப்பவர்களும் நிலைமை கட்டுக்குள் வரும் வரை வெளியே செல்வதைத் தவிர்த்து தங்கள் வீடுகளிலேயே இருந்து கொள்வது அவர்களுக்கும் பாதுகாப்பு, சமூகத்திற்கும் பாதுகாப்பு. 

இந்த வகையில் நாம் அனைவரும் எச்சரிக்கையாகவும் பாதுகாப்பாகவும் இருந்தால் அதிகமாக கொரோனா வைரஸ் பரவ வாய்ப்பில்லை. குறைந்த அளவில் பாதிக்கப்படுபவர்களும் நல்ல முறையில் சிகிச்சை பெற்று குணம் பெற்று விட முடியும்.

என்.கணேசன்

டென்ஷனைக் குறைக்கும் நடை தியானம்!

அன்பு வாசகர்களுக்கு வணக்கம்.

இன்றைய நம் வாழ்க்கையின் தவிர்க்க முடியாத அம்சமாக ‘டென்ஷன்’ அமைந்திருக்கிறது. சிறு வயதினரிலிருந்து முதியோர் வரை அதிகம் உபயோகப்படுத்தும் வார்த்தைகளில் டென்ஷன் முதலிடம் வகிக்கிறது. இந்த டென்ஷனைக் குறைக்க எளிய நடை தியானம், மற்றும் குட்டி தியான முறைகளை இந்தக் காணொளியில் சொல்லியிருக்கிறேன். கேட்டு பின்பற்றிப் பலன் அடையுங்கள்.

அன்புடன்

என்.கணேசன்

மார்கழியில் ஆன்மிகமும், ஆரோக்கியமும்!

அறிவார்ந்த ஆன்மிகம் - 40

மார்கழி மாதம் ஆன்மிக மாதம். “மாதங்களில் நான் மார்கழியாக இருக்கின்றேன்” என்று கிருஷ்ண பரமாத்மா சொல்லி இருக்கிறார். மார்கழி மாதத்தில் நோன்பு இருக்கும் வழக்கம் சங்க காலம் முதலே தமிழரிடம் இருந்து வந்திருக்கிறது என்பதனை  பரிபாடல் முதலான சங்க இலக்கியங்கள் சொல்கின்றன.

மார்கழி மாதத்தில் பெண்கள் நோன்பு இருப்பதால் அந்த நோன்புக்கு மார்கழி நோன்பு என்ற பெயரும் கன்னிப்பெண்கள் ’பாவை’, அதாவது பொம்மை (உருவம்) அமைத்து நோன்பு இருப்பதால் அதற்கு ’பாவை நோன்பு’ என்ற பெயரும் உண்டு.   இந்த நோன்பில் இரண்டு நோக்கங்கள் உண்டு. ஒன்று நல்ல கணவன் வேண்டும் என்பது, இரண்டு, உலகில் நல்ல மழை பெய்ய வேண்டும் என்பது. இப்படி சுயநல நோக்கமும், பொதுநல நோக்கமும் கொண்டு பாவை நோன்பு நோற்கப்படுகிறது. 

சைவ சமயத்தவர்கள் மார்கழிமாதத்தில் வரும் திருவாதிரை நாளிற்கு ஒன்பது நாட்கள் முதல் "நோன்பை" ஆரம்பித்து பத்தாவதுநாள் திருவாதிரை அன்று  நிறைவு செய்வார்கள். ஆனால் வைணவ சமயத்தவர்கள் மார்கழி மாதம் முழுவதும் நோன்பு இருந்து வணங்குவார்கள்.

ஆண்டாள் அருளிய திருப்பாவையும் மணிவாசகப் பெருமான் பாடியருளிய திருவெம்பாவையும் மார்கழி நோன்பை அடிப்படையாகக் கொண்டவை. ஆண்டாள் இயற்றிய பாவைப்பாட்டாகிய    திருப்பாவை முப்பது பாடல்களைக் கொண்டது.  திருப்பாவை ''மார்கழித் திங்கள் மதிநிறைந்த நன்னாளால் நீராடப் போதுவீர் போதுமினோ நேரிழையீர்' என்று தொடங்குகிறது. மாணிக்கவாசகர் சிவபெருமான் மீது இயற்றிய  திருவெம்பாவை இருபது பாடல்களைக்கொண்டது. திருவெம்பாவை  “மார்கழி நீர் ஆடேலோர் எம்பாவாய்''  என்று முடிகிறது. திருப்பாவையின் முப்பது பாடல்களையும், திருவெம்பாவையின் இருபது பாடல்களுடன் 'திருப்பள்ளியெழுச்சி' யிலுள்ள பத்து பாடல்களுடன் சேர்த்து அந்த முப்பது பாடல்களையும் மார்கழி மாத முப்பது நாட்களிலும் பக்தி ரசம் பொங்க வைணவ, சைவ பக்தர்கள் பாடி மகிழ்கிறார்கள்.

மார்கழி மாதத்தில் அதிகாலையில் சூரியன் உதிப்பதற்கு முன்பாகவே எழுந்து வாசல் தெளித்துக் கோலமிட்டு ஆற்றங்கரைக்குச் சென்று நீராடி ஆற்று மணலில் பாவை செய்து அதற்குப் பூஜை செய்வதை அக்காலத்தில் கன்னிப்பெண்கள்  வழக்கமாகக் கொண்டிருந்தார்கள். மனதில் ஒரு லட்சிய புருஷனை வரித்து அப்படிப்பட்டவனே தனக்கு கணவனாக வர வேண்டும் என்று வேண்டிக் கொண்டால் அப்படியே கணவன் அமைவான் என்ற நம்பிக்கை அவர்களுக்கு இருந்தது.  அவ்வாறு இளம் பெண்கள் நீராடும் போது பாவையை நோக்கி ‘பாவாய்’ என அழைத்துப் பாடுவதே பாவைப் பாட்டாகும்.   நோன்பின் போது உண்ணும் உணவிலும், அணிகலன்கள் அணிவதிலும் நிறைய கட்டுப்பாடு வைத்திருந்தார்கள். ஆண்டாளே அறிவிக்கிறாள். '' பாலுண்ணோம் நெய்யுண்ணோம் கோல அணிகலெல்லாம் பூணோம்''. திருமணமான பெண்கள் கணவனின் நலனிற்காகவும், இருவரும் இடைபிரியாதிருக்கவும் வேண்டிக் கொள்வார்கள்.

மார்கழி மாதத்தில் சூரியன் பூராடம் நட்சத்திரத்தில் பயணிக்கும் காலத்தை  "கர்போட்டம்" என்பார்கள். அடுத்த வருடம் வரும் மழைக் காலம்  அதற்கு முன்னாலேயே மார்கழி மாதத்தில் சூல் கொள்கிறது, அது மழைக்குக் கர்ப்பம் தரிக்கும் காலம் என்று அக்காலத்தில் நம்பினார்கள். அந்த சமயத்தில் வாயு மண்டலத்தில் தென்படும் மேகக்கூட்டங்களின் அமைப்பு, காற்றின் தன்மை, பனி, வைகறையில் காணப்படும் வானத்தின் நிறம் ஆகியவற்றைப் பொருத்து வரும் ஆண்டின் மழைக்காலம் அமையும் என்ற கணிப்பு அவர்களூக்கு இருந்தது.

இதை விளக்கும் பழந்தமிழ் பாடல் ஒன்று உண்டு.: 

“தீயபூ ராடம் வெய்யோன் சேர்ந்திடு நாளில் வட்டம்    
தூயமந் தாரம் தோன்றில் சுடரவன் ஆதி ரைக்கே       

பாயுநாள் தொட்டு முன்பின் ஒருநாட்கும் பதினாலாக    
காயும்வேற் கண்ணாய் சொல்லும் கார்மழை கர்ப்பம் தானே”

மார்கழி மாதம் தனுசுராசியில் சூரியன் நகரும் பதிநான்கு நாள்களில் காணப்படும் தட்பவெப்ப நிலையைப் பொருத்து எதிர் வரும் ஆண்டின் குறிப்பிட்ட மாதங்களில் மழைபொழிவு இருக்கும் என்பதே இப் பாடலின் கருத்து.

அதனால் தான் நன்றாக மழை பெய்ய வேண்டும் என்று மார்கழி நோன்பின் போதே, வேண்டிக் கொள்ளும் வழக்கம் அன்று இருந்தது. பாவை நோன்புக்கும் மழைக்கும்  உள்ள தொடர்பையும்  ஆண்டாளும் தன் பாடலில் வெளிப்படுத்தி உள்ளாள்.  'நாங்கள் நம் பாவைக்குச் சாற்றி நீராட்டினால், தீங்கின்றி  நாடெல்லாம் திங்கள் மும்மாரி பெய்யும்" என்று கூறியுள்ளாள். திருவெம்பாவை, திருப்பாவை இரண்டிலுமே ‘மழை பொழிய வேண்டும்’ என்னும் வேண்டுதல் உண்டு.

மார்கழி மாதத்தில் அதிகாலையில் எழுந்து கோயிலுக்குச் சென்று இறைவனை வணங்குவது மிக விசேஷமாகக் கருதப்படுகிறது. சிறு பிள்ளைகள் கூட சோம்பல் இல்லாமல் வரவேண்டும் என்று உற்சாகப்படுத்த கோயில்களில் பொங்கல், சுண்டல் எல்லாம் தருவதுண்டு. மார்கழி மாத வழிபாட்டிற்கு மட்டும் ஏன் இந்த தனிச்சிறப்பு என்பதற்கு அறிவியல் காரணமும் உண்டு.

மார்கழி மாதத்தில் அதிகாலை நேரத்தில் காற்று மண்டலத்தில் ஓசோன் மிக அதிகமாகக் கிடைக்கிறது. இந்த ஓசோன் படலம் தான் சூரியனிடம் இருந்து வருகின்ற Ultra Violet Rays என்று சொல்லப்படுகிற  கேடு விளைவிக்கின்ற புற ஊதாக்கதிர்களை உறிஞ்சி  உயிரினங்கள் அழியாமல் பாதுகாக்கிறது. மார்கழி மாத அதிகாலைகளில் சூரியனின் உதயத்திற்கு முன்பாக அதிகமாகக் கிடைக்கும் இந்த ஓசோனுக்கு வீரியம் அதிகம். இதைச் சுவாசிப்பதால் நம் உடலில் உள்ள இரத்தம் விரைவாகச் சுத்தம் அடைகிறது. நரம்பு மண்டலத்தைத் துடிப்பாக வைத்துக் கொள்ள முடிகிறது. அதனால் நினைவாற்றல் பெருகுகிறது. ஓசோன் நிறைந்த  மார்கழி மாதக் காற்று தோலுக்கும், வெள்ளை சிகப்பு உயிர் அணுக்களுக்கும், புற்று நோய் தீர்வுக்கும் கூட மிகவும் உதவியாக இருப்பதாக்க் கூறுகிறார்கள்.

இவ்வாறு நன்மை பயக்கும் ஓசோனைச் சுவாசிப்பதற்கு நாம் வெளியில் செல்ல வேண்டும். இவ்வளவு அதிகாலைக் குளிரில் வெறுமனே மக்களை வெளியே சென்று ஓசோன் நிறைந்த காற்றைச் சுவாசிக்கச் சொன்னால் பலர் கேட்க மாட்டார்கள் என்று அதில் பக்தியை சேர்த்து நம் முன்னோர் கட்டாயமாக்கி விட்டார்கள். ஓசோன் வாயு அதிகமாகக் கிடைக்கும் அந்த அதிகாலை நேரத்தை வழிபாட்டு நேரமாக்கி விட்டார்கள்.

அதிகாலையில் விழித்தெழுந்து வாசலில் நீர் தெளித்து சாணமிட்டு மொழுகி கோலமிட்டு, ஆற்றங்கரைக்குச் சென்று நீராடுவது, கோவிலுக்குச் செல்வது, பஜனை செய்வது  போன்ற செயல்களில் உடல் ரீதியான  நல்ல மாற்றங்களும் நிகழ்கின்றன. அதோடு ஆன்மிக வளர்ச்சியும் ஏற்படுகிறது.

காலப் போக்கில் ’பாவை நோன்பு முறை’ காலாவதியாகி விட்டது. ஆண்டாளின் திருப்பாவையும், மாணிக்க வாசகரின் திருவெம்பாவையும் தான் மார்கழி வைகறையில் நம்மைத் தெய்வ சிந்தனையில் ஈடுபட வைக்கின்றன. மார்கழி மாதம் விடியற்காலையில் கோயில் செல்வது, பஜனைசெய்வது மட்டும் பலரால் இன்னும் பின்பற்றப்படுகிறது.  தற்போது ஐயப்ப பக்தர்களும் மார்கழி மாத வழிபாட்டில் பெருமளவு ஈடுபடுகின்றனர். இப்படி ஆன்மிகத்தையும், ஆரோக்கியத்தையும் வளர்க்கும் மார்கழி மாத வழிபாட்டில் நாமும் ஈடுபட்டு இரட்டைப் பலனை அடைவோமே!

-என்.கணேசன்

நன்றி: தினத்தந்தி – ஆன்மிகம் - 10-12-2013                  

வளமான வாழ்விற்கு வழிகள் பத்து!

முதுமை என்றாலே தள்ளாத வயது என்று அர்த்தப்படுத்திக் கொள்ளும் வழக்கம் பலரிடம் இருக்கிறது. முதுமையோடு முடியாமையை இணைத்தே அவர்கள் பார்க்கிறார்கள். முதுமை என்றால் உடல் ஆரோக்கியம் இல்லாமல் இருப்பதும் மன அமைதி இல்லாமல் இருப்பதும் தவிர்க்க முடியாதவை என்று எண்ணுகிறார்கள். ஆனால் நூறாவது பிறந்த நாளை சென்ற வருடம் அக்டோபர் நான்காம் தேதி கண்டு நூற்றி ஒன்றாவது பிறந்த நாளை அடுத்த மாதம் கொண்டாட இருக்கும் ஒரு ஜப்பானிய டாக்டர் இன்றும் தன் மருத்துவத் தொழிலைச் செய்து கொண்டு இருக்கிறார், இப்போதும் புத்தகங்கள் எழுதிக் கொண்டிருக்கிறார், உலக நாடுகளுக்குப் பயணித்து சொற்பொழிவாற்றிக் கொண்டிருக்கிறார் என்றால் வியப்பாக இருக்கிறது அல்லவா?

அந்த டாக்டரின் பெயர் டாக்டர் ஷிகிகி ஹினோஹரோ (Dr. Shigeaki Hinohara). இவர் தன் எழுபத்தைந்தாம் வயதிற்கு மேல் 150 நூல்களை வெளியிட்டுள்ளார். அந்த நூல்களில் ’நீண்ட காலம் வாழ்வதும், நன்றாக வாழ்வதும்’ (Living Long, Living Good) மிகவும் பிரபலமானது. இது பன்னிரண்டு லட்சத்திற்கும் மேலான பிரதிகள் விற்பனையாகி இருக்கிறது. இவர் 75 வயதிற்கும் மேற்பட்ட வயதானவர்களுக்காக “புதிய முதியோர் இயக்கம்” (New Old People's Movement) என்ற இயக்கத்தை ஆரம்பித்துள்ளார். இதன் மூலமாக அவர் மக்களை நீண்ட காலம் நலமாய் வாழ உற்சாகப்படுத்தி வருகிறார்.

மனித உடலில் கிட்டத்தட்ட 36000 வித்தியாசமான ஜீன்கள் இருப்பதாகவும் அந்த ஜீன்களை மனிதர்கள் பயன்படுத்தத் தவறி விடுகிறார்கள் என்றும் அவர் கூறுகிறார். புதிய புதிய துறைகளில் புதிய புதிய முயற்சிகள் மேற்கொண்டு உடலையும் மனதையும் முதியவர்கள் இளமையாகவும், மகிழ்ச்சியாகவும் வைத்துக் கொள்ளலாம் என்கிறார் அவர். அது புதிய கலையானாலும் சரி, புதிய விளையாட்டானாலும் சரி புதியவற்றில் உற்சாகமாக ஈடுபடுவதே உடல், மன நலத்திற்கு பேருதவி செய்யும் என்கிறார்.

நூறாண்டு காலத்தையும் தாண்டி வெற்றிகரமாக வாழ்ந்து வரும் அவர் வளமான, நலமான, நீண்ட வாழ்வுக்கு பத்து வழிகளைச் சொல்கிறார். அவற்றைச் சுருக்கமாகப் பார்ப்போம்.

1) உற்சாகம் முக்கியம்

உண்பதும், உறங்குவதும் முக்கியமே என்றாலும் அவற்றை விட அதிக முக்கியம் உற்சாகமாக இருப்பது. குழந்தைகள் உற்சாகமாக விளையாடும் போது சாப்பாடு, உறக்கம் மறந்து போய் விளையாடுவது போல அதே உற்சாகத்தை வாழ்க்கையில் உருவாக்கிக் கொண்டால் கண்டிப்பாக நம்முள் ஒரு பெரும் சக்தியை உணர்வோம் என்கிறார் அவர்.

2) எடை கூடாதீர்கள்

உங்கள் எடை கூடிக் கொண்டே போகாமல் ஒரு கட்டுப்பாட்டுக்குள் வையுங்கள் என்கிறார் அவர். சரியான சத்தான உணவுகளை அளவாக உட்கொள்வதும் வயிற்றுக்கு அதிக வேலை கொடுக்காமல் இருப்பதும் சுறுசுறுப்புக்கும் உடல்நலத்திற்கும் வழி வகுக்கும் என்கிறார்.

3) திட்டமிடுங்கள் 

திட்டமிட்டு வாழுங்கள். அதன்படி இயங்குங்கள். தினமும் நல்ல விஷயங்களில் ஈடுபாடுடன் இருந்தால், எதிர்பார்க்க ஏதாவது ஒன்று எப்போதும் இருப்பதுடன் உற்சாகமும் இருக்கும், மனமும் இளமையாக இருக்கும் என்கிறார் அவர்.

4) எதையும் அனுபவித்து செய்யுங்கள்

எதைச் செய்கிறோமோ, அதில் முழு மனதுடன் ஈடுபட்டு அனுபவித்து செய்தோமானால் ஓய்வு பெறும் எண்ணமே எழாது. அறுபது வயது வரை குடும்பத்திற்காக உழைக்கிறவர்கள், அதற்குப் பின் சமூகத்திற்காகவும், மனிதகுலத்திற்காகவும் தங்களை அர்ப்பணித்து விட வேண்டும். அதையும் அனுபவித்து செய்தோமானால் நாம் நாலு பேருக்கு உபகாரமாக இருக்கிறோம் என்ற திருப்தியில் தனியொரு சக்தியையும் நிறைவையும் நாம் உணர்வோம் என்கிறார்.

5) பெற்றதைப் பகிர்ந்து கொள்ளுங்கள்

எத்தனையோ கற்கிறோம் என்றாலும் அதனை அடுத்தவர்களுடன் பகிர்ந்து கொண்டு உதவும் போது அவர்கள் வாழ்க்கையுடன் சேர்ந்து நம் வாழ்க்கையும் சிறப்புற அமைகிறது என்கிறார். அப்படிப் பகிர்ந்து கொள்ளும் போது நம் அறிவையும் புதுப்பித்துக் கொள்கிறோம் அல்லவா?

6) இயற்கைக்கு வாய்ப்பளியுங்கள்

எல்லா வியாதிகளுக்கும் விஞ்ஞான மருத்துவ உதவியையே நாடாதீர்கள் என்கிறார் இந்த மருத்துவர். விஞ்ஞான மருத்துவத்தில் எல்லைகள் என்றுமே உண்டு என்கிறார் அவர். இயற்கை அழகுடன் இயைந்து வாழ்தல், செல்லப் பிராணிகளுடன் மகிழ்தல், இசையில் ஆழ்தல், போன்றவை உடலோடு மனத்தையும் குணப்படுத்துவன. அதை மருத்துவரும் பரிந்துரைக்க முடியாது, விஞ்ஞான மருந்துகளும் தந்து விட முடியாது என்கிறார்.

7) நடங்கள், படியேறுங்கள்

உடலுக்கு வேலை கொடுத்து உங்கள் தசைகளை வலுவாக வைத்துக் கொள்ள முடிந்த வரை நடப்பது, லிப்டில் போவதற்கு பதிலாக படியேறிச் செல்வது போன்ற சிறிய சிறிய வேலைகளில் பெரிய பலன் உடலுக்குக் கிடைப்பதாக அவர் சொல்கிறார்.

8) பணம், பொருள்களில் மிதமாக இருங்கள்

உண்மையான சந்தோஷத்தை பணத்தாலோ, சேர்த்து வைக்கும் சொத்துகளாலோ நாம் அடைந்து விட முடியாது என்பதால் அவற்றில் ஒரு அளவான, மிதமான மனோபாவம் இருப்பது நல்லது என்கிறார். அவை முக்கியம் என்பதை மறுக்காத அவர் அவற்றை விட திருப்தி அதிக முக்கியம் என்கிறார்.

9) எதிர்பாராதவற்றையும் பயன்படுத்திக் கொள்ளுங்கள்

கோடுபோட்டது போல் போவது வாழ்க்கை அல்ல. எத்தனையோ சந்தர்ப்பங்களில் நாம் எதிர்பாராதவையே அதிகம் நடக்கின்றன. அவை எல்லாமே மகிழ்ச்சியளிக்கும் விதத்தில் இருப்பதில்லை என்றாலும் அவர்றிலும் ஒரு படிப்பினையைப் பெறுவதும் நம் முன்னேற்றத்திற்காக ஏதாவது விதத்தில் பயன்படுத்திக் கொள்வதும் நம்மை உயர்த்துவதோடு பக்குவப்படுத்தவும் செய்யும் என்கிறார்.

10) எட்ட முடியாத உயரத்தைக் குறிக்கோளாக்குங்கள்

சாதாரணமாக எட்ட முடியாத உயரத்தை குறிக்கோளாக வைத்துக் கொள்ளுங்கள். அதை நோக்கிப் பயணிக்கும் போது தான் நம்மிடம் உள்ள கூடுதல் திறமைகளை நம்மால் அறிந்து கொள்ள முடியும். நல்ல ’ரோல் மாடல்’ ஒருவரையும் வைத்துக் கொள்வது நமக்கு ஊக்கசக்தியாக அமையும் என்று அவர் கூறுகிறார்.

அறுபது வயதில் வாழ்க்கை முடிந்து விடுவதாகவும் பின் சாகும் வரை எப்படியோ வாழ வேண்டும் என்பதாகவும் நினைப்பவர்கள் பலர் இருக்க, நூறிலும் ஒரு வாழ்க்கை முடிந்து விடுவதில்லை, அதன் உற்சாகமும் குறைந்து விடுவதில்லை என்கிறார் டாக்டர் ஷிகிகி ஹினோஹரோ. அப்படிச் சொல்பவர் அதை சாதித்தும் காட்டியவர் என்பதால் அவரிடம் இருந்து இவற்றைக் கற்றுக் கொண்டு முடிந்த வரை பின்பற்றினால் நாமும் முதுமையிலும் தளர்ந்து விட மாட்டோம் என்பது நிச்சயம்!.

- என்.கணேசன்

வயதில்லா உடலும், காலமறியா மனமும்

”உடல் உள்ள வரை கடல் கொள்ளாக் கவலைகள்” என்றும், “மனம் அனைத்து துன்பங்களிற்கும் உற்பத்திக்கூடம்” என்றும் சொல்வார்கள். அதிலும் வாழ்க்கை இளமையிலிருந்து விலகி முதுமையை நோக்கிச் செல்லச் செல்ல உடலும் மனமும் ஏற்படுத்துகின்ற பிரச்சினைகள் அதிகரித்துக் கொண்டே செல்கிறது. பெரும்பாலோருடைய கருத்தும், அனுபவமும் இப்படி இருக்கையில் அதற்கு எதிர்மாறான ஒரு கருத்தை Ageless Body and Timeless Mind (வயதில்லா உடலும் காலமில்லா மனமும்) என்ற தன் நூலில் ஆதாரபூர்வமாய், அழுத்தம் திருத்தமாய் சொல்கிறார் தீபக் சோப்ரா.

இந்தியாவில் பிறந்து வளர்ந்து அமெரிக்காவில் குடியேறிய தீபக் சோப்ரா மருத்துவப் படிப்பில் M.D பட்டம் பெற்றவர். உடல்-உள்ளம் சம்பந்தப்பட்ட பல ஆராய்ச்சிகளில் ஆர்வம் காட்டியவர். அவர் எழுதிய சுமார் 65 புத்தகங்களில் 19 புத்தகங்கள் நியூயார்க் டைம்ஸ் பத்திரிக்கையின் அதிக விற்பனையான மற்றும் பிரபலமான புத்தகங்கள் பட்டியலில் இடம் பிடித்தவை. அதிலும் ’வயதில்லா உடலும், காலமில்லா மனமும்’ என்ற இந்தப் புத்தகம் அந்தப் பட்டியலில் தொடர்ந்து பல வாரங்கள் தங்கிய புத்தகம். இதில் அவர் அலசி இருக்கும் விஷயங்களும், சொல்லியிருக்கும் உண்மைகளும் மிக மிக சுவாரசியமானவை மட்டுமல்ல மிகவும் உபயோகமானதும் கூட. அவற்றைப் பார்ப்போம்...

உடலுக்கும் உள்ளத்திற்கும் இடையே உள்ள தொடர்பு நெருக்கமானது என்பதை விட இரண்டும் பின்னிப் பிணைந்தவை என்று சொல்வதே பொருத்தமாக இருக்கும். நம் உடலில் உள்ள செல்கள் நம் எண்ணங்களால் தொடர்ந்து மாறிக் கொண்டே இருப்பவை என்கிறார் சோப்ரா. செல்களின் செயல்பாடுகள் துரிதப்படுவதும், வேகம் குறைவதும், அப்படியே நின்று போவதும், ஏன் தலைகீழாய் பின்னுக்குச் செல்வதும் கூட மனதின் எண்ணங்களைப் பொறுத்து சாத்தியமாகின்றன என்கிறார் அவர்.

செல்களின் சுமார் 90% சக்தி உடலை ரிப்பேர் செய்வதிலும், உடலுக்குத் தேவையான பாதுகாப்பு அரண்களை ஏற்படுத்துவதிலும், சீரமைப்பதிலும் செலவாகிறது. ஆனால் மனம் எதைப் பற்றியாவது கவலை கொண்டாலோ, பயம் கொண்டாலோ, ஏதோ ஆபத்தை உணர்ந்தாலோ செல்கள் அந்த வேலை செய்வதை விட்டு விட்டு மனம் சொல்லும் விஷயங்களில் தங்கள் சக்தியை செலவழிக்கின்றன. இது எப்போதாவது ஒரு முறை நடந்தால் பெரிய பாதகம் இல்லை. ஆனால் இது எப்போதுமே நடந்து கொண்டிருந்தால் உடல் பாதுகாப்பும் சீரமைப்பும் கைவிடப்பட்டு மனதின் கற்பனை அவசரங்களில் செல்களின் சக்தி வீணாகிறது. அதனால் அப்படிப்பட்டவர்களின் உடல்கள் சீக்கிரமாகவே முதுமையடைகின்றன, சீக்கிரமாகவே நோய்வாய்ப்படுகின்றன என்கிறார் சோப்ரா. கான்சர், பக்கவாதம் போன்ற நோய்கள் அதிகமாக துக்க காலத்தில் தான் உடலைத் தாக்குவதில் வெற்றியடைகின்றன என்று ஆராய்ச்சிகளை மேற்கோள் காட்டி அவர் கூறுகிறார்.

நமது உடற்கூறின் அடிப்படையான DNA மாறுவதில்லை என்ற போதிலும் அதன் நகலானதும், வேலையாளுமான  RNA நமது எண்ணங்களுக்கும் உணர்ச்சிகளிற்கும் ஏற்ப தூண்டப்பட்டு அடிக்கடி தன் வேலையை மாற்றிக் கொண்டேயிருக்கிறது. அதனால் உடல் கட்டமைப்பையும் அதன் சக்தியையும் நிர்ணயிக்கும் சக்தியையும் பெற்றுள்ள  RNA நமது தவறான எண்ணப்போக்கால் ஒழுங்காக வேலை செய்வதில்லை. சீக்கிரமே சக்தி இழக்கும் உடல் நோயால் விரைவாகவே பாதிக்கப்படுகிறது என்கிறார் அவர்.

இதற்கு பல ஆதாரங்களுடன் கூடிய விரிவான விளக்கத்தையும் தருகிறார் தீபக் சோப்ரா.

முதுமை தவிர்க்க முடியாதது என்ற கூற்றை அவர் முழுமையாக ஒத்துக் கொள்ள மறுக்கிறார். உலகில் ஒரு செல் அமீபா, அல்கே, ப்ரோடோசோவா போன்ற சில உயிரினங்கள் முதுமை அடைவதில்லை என்கிறார். நம் அறிவுத் திறன், உணர்வுகள், தனித்தன்மைகள் முதுமையடைவதில்லை என்கிற அவர் நமது DNAவின் பெரும்பகுதி கூட வயதிற்கேற்ப மாறுவதில்லை என்கிறார்.

தேனீக்களின் வாழ்க்கையை விஞ்ஞானிகள் மிக நுணுக்கமாக ஆராய்ந்து கண்ட அதிசயங்களை விவரித்து தன் வாதத்திற்கு வலுவூட்டுகிறார் அவர். தேன்கூட்டிற்குள் தங்கி முட்டைகளைப் பாதுகாப்பதும், அப்போது தான் பிறந்த புதிய தேனீக்களின் உணவுத் தேவைகளைக் கவனிப்பதும் இளம் தேனீக்களின் வேலை. மூன்று வாரங்கள் வளர்ந்த பிறகு தேன் சேகரிக்க வெளியே சென்று விடும் மூத்த தேனீக்களாக அவை மாறி விடும். இது தான் அவற்றின் இயற்கையான செயல்பாடு. ஆனால் அவசர காலங்களில் அவற்றின் வயதும் வேலையும் ஹார்மோன்களின் உதவியுடன் விரைவுபடுத்தப்படுவதையும், தலைகீழாய் திரும்புவதையும் கண்டு விஞ்ஞானிகள் அசந்திருக்கிறார்கள். உதாரணத்திற்கு கூட்டுக்குள் தேவைக்கும் அதிகமான தேனீக்கள் இருந்து வெளியே சென்று தேன் சேகரிக்கும் தேனீக்கள் குறைந்தால் கூட்டில் உள்ள இளம் தேனீக்களின் வயது தானாக ஹார்மோன்கள் இயக்கத்தால் மூன்று வாரமாகக் கூடி தேன் சேகரிக்கக் கிளம்பி விடுகின்றன என்பதைக் கண்டுபிடித்திருக்கின்றனர். அதே போல் கூட்டிற்குள் வேலை செய்யும் தேனீக்களின் எண்ணிக்கை மிகவும் குறைந்து வெளியே செல்லும் முதிய தேனீக்கள் எண்ணைக்கை அதிகமாக இருக்கும் பட்சத்தில் தேவையான அளவு முதிய தேனீக்கள் தங்கள் ஹார்மோன்கள் வேலைப்பாட்டால் இளமையாகி கூட்டு வேலைகளைச் செய்ய ஆரம்பித்து விடுகின்றனவாம்.

தேனீக்கள் மாறும் அளவிற்கு மனிதன் மாற முடியா விட்டாலும் மனித உடலிலும் மூளை தேவைக்குத் தகுந்தபடி பல அற்புதங்களைச் செய்வதை உதாரணமாக தீபக் சோப்ரா சுட்டிக் காட்டுகிறார். மூளையின் வழித்தடங்கள் முதிய வயதிலும் நீள்வதையும், சில நியூரான்கள் சுருங்கும் போது குறுக்குத் தடங்கள் உருவாகி செயல்பாடுகளில் குறைவில்லாமல் மூளை இயல்பாகவே பார்த்துக் கொள்ள முயல்வதையும் விவரிக்கிறார்.

ஆனால் உடல் தன் வேலையை இயல்பாகச் செய்ய நாம் அனுமதிக்க வேண்டும். அதற்கு இடையூறுகளையும் தடைகளையும் நாமாக நம் தவறான வாழ்க்கை முறையாலும், பழக்க வழக்கங்களாலும் ஏற்படுத்தி விடக் கூடாது என்று அவர் அறிவுறுத்துகிறார். அதற்கு பொருள் பொதிந்த அறிவுரைகள் சிலவற்றை மிக விரிவாக இந்த புத்தகத்தில் விளக்கியிருக்கிறார். அவற்றில் முக்கியமானவை சிலவற்றை சுருக்கமாகப் பார்ப்போம்.

நாம் உடலைப் பொருத்த வரை எந்திரமாக இயங்கப் பழகி விட்டோம். இயற்கையாக நடக்கும் உடலின் செயல்களுக்கு நாம் கவனம் தருவதில்லை. அது ஏதாவது வேலையைச் சரிவர செய்யாமல் போனால் அது மட்டும் தான் கவனத்திற்கு வருகிறது. அந்த சமயத்தில் அது பெரும்பாலும் மருந்தில்லாமல் குணமாகாத நிலைக்கு சென்று விட்டிருக்கும். உடலின் ஒவ்வொரு பகுதியையும், அது செய்யும் வேலையையும் விழிப்புணர்வோடு நம்மை அவ்வப்போது கவனிக்கச் சொல்கிறார். அனிச்சையாக நடக்கும் செயலுக்கு நம் கவனத்தையும் தருவது அப்பகுதியையும், அதன் செயலையும் சீராக்கும் என்று அவர் சொல்கிறார்.

பயன்படுத்தாத எதுவும் பலமிழந்து போகும் என்பது உடலியலிலும், மனவியலிலும் நிரூபிக்கப்பட்ட உண்மை. உடலுறுப்பும் சரி, நம் திறமைகளும் சரி பயன்படுத்தத் தவறும் போது பலமிழந்து கொண்டே வந்து ஒரு கட்டத்தில் பயன்படுத்த முடியாததாகவே மாறி விடுகிறது. ஒவ்வொரு தகவலையும் உடல் அவ்வப்போது நமக்கு நுணுக்கமாகத் தெரிவிக்கிறது. ஆனால் எந்திரத்தனமாக செயல்படும் நாம் மற்ற எத்தனையோ விஷயங்களில் மும்முரமாக இருந்து அது சொல்லும் செய்திகளைக் கேட்கத் தவறி விடுவதால் தான் நோய்வாய்ப்படுகிறோம் என்கிறார் அவர்.

வாழும் விதத்திலும் சிந்திக்கும் விதத்திலும் நாம் செய்யும் சின்ன திருத்தமும் நம்மை மிகப் பெரிய விதத்தில் மாற்றும் வலிமை கொண்டது என்கிறார். ஒரு சிஷ்யன் குருவிடம் தன் சந்தேகத்தைக் கேட்டான். ”நாம் இருவரும் ஒரே மாதிரி தானே இந்த உலகில் வாழ்கிறோம். பின் எது நம் இருவரையும் வித்தியாசப்படுத்துகிறது?”

குரு சொன்னார். “நீ இந்த உலகில் உன்னைப் பார்க்கிறாய். நான் என்னில் இந்த உலகத்தைப் பார்க்கிறேன்”

சின்னதாய் பார்க்கும் விதம் மாறினாலும் உலகமும், வாழ்க்கையும் மிகப்பெரிய அளவில் மாறி விடுகிறது. வெளியுலகில் நடக்கும் சம்பவங்களுக்கு உண்மையில் நம்மை மாற்றும் சக்தி இல்லை என்கிறார் அவர். அதை நாம் எப்படி எடுத்துக் கொள்கிறோம் என்பதை வைத்தே நம் வாழ்க்கை அமைகிறது என்று சொல்கிறார்.

உடல் மீது இவ்வளவு ஆதிக்கம் செய்ய முடிந்த மனதைக் கட்டுப்படுத்துவதில் இக்கால மனிதர்கள் வெற்றி பெறாததே அவர்களது மன உளைச்சலுக்கும், துன்பங்களுக்கும் காரணம் என்று அவர் கூறுகிறார். வாழ்க்கை முறையில் எளிமை இல்லாததும், பொய்யான தேவைகளை உருவாக்கிக் கொண்டு அதை நிறைவேற்ற போராட்ட வாழ்க்கையை நடத்துவதும், இயற்கையிலிருந்து விலகிக் கொண்டே செல்வதும், அவசர ஓட்டமும் இக்கால மனிதர்களின் நிம்மதியின்மைக்கு முக்கிய காரணங்களாக அவர் சொல்கிறார்.

ஒரு செயலில் முழுமையாக ஈடுபடும் போது நம்மைப் பொறுத்த வரை காலம் நின்று போகிறது, அல்லது மறக்கப்படுகிறது. அதில் நாம் களைப்படைவதும் இல்லை. ஆனால் இன்று பெரும்பாலான மனிதர்கள் வாழ்க்கை ஓட்டத்தின் வேகத்திலும் களைத்தல்லவா போகிறார்கள். இதையும் மிக அழகாகத் தன் நூலில் கையாண்டிருக்கும் தீபக் சோப்ரா எல்லாவற்றையும் மாற்றி உடலிலும், உள்ளத்திலும் புத்துணர்ச்சியையும், சிறந்த மாற்றத்தையும் ஏற்படுத்த இந்தப் புத்தகத்தில் சில தியான முறைகளையும், புரட்சிகரமான சிந்தனைகளையும், பயிற்சிகளையும் விளக்கி இருக்கிறார். எல்லாமே அறிவுபூர்வமாகவும், எளிமையாகவும் இருப்பது தான் இந்த நூலின் தனிச்சிறப்பு. 

342 பக்கங்கள் கொண்ட இந்த நூல் முழுவதிலும் விஞ்ஞானமும், மெய்ஞானமும் விரிவாகவே அலசப்படுகிறது. இரண்டையும் அழகாக இணைத்து தெளிவான முடிவுகளைத் தந்திருப்பதிலும், மாற்றத்திற்கான வழிமுறைகளைக் காட்டி இருப்பதிலும் தீபக் சோப்ரா வெற்றி பெற்றிருக்கிறார். மொத்தத்தில், உடல்ரீதியாகவும், மனரீதியாகவும் இழந்து விட்ட தனிச்சிறப்புகளை மீண்டும் மீட்டெடுக்க இன்றைய மனிதனுக்கு இந்த நூல் வரப்பிரசாதம் என்றே சொல்ல வேண்டும்.

- என்.கணேசன்

முதுமையிலும் மூளையின் ஆற்றல் குறையாதிருக்க …

முதுமையிலும் மூளையின் ஆற்றல் குறையாதிருக்க …

முதுமை நெருங்க நெருங்க மனிதன் எத்தனையோ ஆற்றல்கள் இழக்க நேர்கிறது. உடல் தளர்வது மட்டுமல்ல மூளையின் ஆற்றலும் படிப்படியாகக் குறைய ஆரம்பிப்பதை அவன் நிறையவே உணர்கிறான். முன்பு போல் அவனால் பலவற்றை நினைவில் வைத்துக் கொள்ள முடிவதில்லை. புதியனவற்றைக் கற்றுக் கொள்வது முன்பு போல் அவனுக்கு எளிதாக இருப்பதில்லை. இது பொதுவாக நாம் எல்லோரும் நம்பும் யதார்த்த நிலை என்றாலும் பல அறிவியல் ஆராய்ச்சிகள் இந்த நம்பிக்கை உண்மையைச் சாராதது என்று சொல்கின்றன. முதுமையிலும் மூளையின் ஆற்றலை சிறப்பாக மனிதன் தக்க வைத்துக் கொள்ள முடியும் என்று ஆராய்ச்சிகள் அடித்துச் சொல்கின்றன.

முதலில் தனிப்பட்ட ஆராய்ச்சிகளையும், அதன் முடிவுகளையும் பார்ப்போம்.

பெர்க்ளியைச் சேர்ந்த மரியன் டயமண்ட் (Marian Diamond) என்ற 78 வயதான உயிரியல் பேராசிரியர் முதுமையிலும் மூளைத்திறன் சிறப்பாக செயல்பட ஐந்து முக்கியத் தேவைகளைச் சொல்கிறார். 1) சரியான உணவு 2) உடற்பயிற்சி 3) சவால்களை எதிர்கொள்தல் 4) புதுமைகளில் ஆர்வம் 5) அன்பு. இது அவரது ஆராய்ச்சியின் கண்டுபிடிப்புகள் மட்டுமல்ல. அவரே அதற்கான வாழும் உதாரணம். 78 வயதான பின்னும் பாடம் நடத்தும் அவரிடம் “நீங்கள் ஏன் ஓய்வு பெறவில்லை” என்று கேட்ட போது “நான் ஏன் ஓய்வு பெற வேண்டும்?” என்று திருப்பிக் கேட்டிருக்கிறார் அவர். சென்ற வருடம் அவர் நடத்தும் மனித உடலியல் வகுப்பிற்கு 736 மாணவர்கள் படிக்க பதிவு செய்திருந்தார்கள்.

அமெரிக்க நரம்பியல் அகேடமி(American Academy of Neurology)யின் புதிய கண்டுபிடிப்பு ஒன்று ஒரு வார காலத்தில் ஆறு முதல் ஒன்பது மைல்கள் வரை நடக்கும் முதியோர் தங்கள் நினைவு சக்தியை தக்க வைத்துக் கொள்வதாகக் கூறுகின்றன.

ஃப்ராங்க் லாலிஸ் (Frank Lawlis) என்ற அமெரிக்காவைச் சேர்ந்த மனவியல் வல்லுனர் நன்றாக மூச்சுப் பயிற்சியில் ஈடுபடும் முதியவர்கள் உணவு உட்கொள்வதிலும் கவனமாக இருந்தால் மூளைத் திறன் குறையாமல் இருப்பார்கள் என்று தனது ஆராய்ச்சி ஒன்றின் முடிவாகச் சொல்லி இருக்கிறார்.

ஜார்ஜ் ரோச்செல்லெ (George Rozelle) என்ற அமெரிக்க நரம்பியல் சிகிச்சையாளர் (neurotherapist) நல்ல உறக்கம், சுறுசுறுப்பான தன்மை ஆகிய இரண்டும் இருக்கும் முதியவர்களின் மூளைத் திறன் சிறப்பாக இருப்பதாகக் கூறுகிறார்.

கான்சாஸ் பல்கலைக் கழகத்தைச் சேர்ந்த ப்ரெண்டா ஹன்னா பேடி (Brenda Hanna-Pladdy) என்ற ஆராய்ச்சியாளர் வாழ்நாள் முழுவதும் இசையில் முழுமூச்சாக ஈடுபடும் மனிதர்களின் மூளை சிறப்பாக செயல்படுகிறது என்று கூறுகிறார்.

ஆர்னால்டு ஸீபெல் (Arnold Scheibel), என்ற ஒரு மூளை ஆராய்ச்சிக் கழகத்தின் (UCLA’s Brain Research Institute) இயக்குனர் புதியனவற்றைக் கற்க அதிக ஆர்வம் காட்டுபவர்களின் மூளை தன் திறனை இழக்காமல் இழக்காமல் பெருமளவு தக்க வைத்துக் கொள்கிறது என்று கூறுகிறார்.

இலினாய் பல்கலைகழகத்தைச் சேர்ந்த ஆர்ட் க்ரேமர் (Art Kramer) என்ற விஞ்ஞானியும், பிட்ஸ்பர்க் பல்கலைகழகத்தைச் சேர்ந்த கிர்க் எரிக்சன்(Kirk Erickson) என்ற விஞ்ஞானியும் சேர்ந்து நடத்திய ஆராய்ச்சியில் மனிதர்களின் வாழ்க்கை முறையும், பழக்க வழக்கங்களும் மூளையின் ஆற்றலைத் தீர்மானிப்பவையாக இருக்கின்றன என்று கூறுகிறார்கள். ஓயாத கவலை, மன அழுத்தம், அதிகமாகக் குடித்தல் ஆகியவை மூளையின் செயல்பாட்டுத் திறனைப் பெருமளவு குறைத்து விடுவதாகக் கூறுகின்றனர்.

இந்த ஆராய்ச்சிகளும், இது போன்ற வேறு பல ஆராய்ச்சிகளும் முதுமையிலும் மூளைத் திறனைக் கூர்மையாகத் தக்க வைத்துக் கொள்ள சில ஆலோசனைகளைத் தொகுத்து சுருக்கமாகப் பார்ப்போம்.

1) உணவுப் பழக்கங்கள்:

உணவில் நிறைய காய்கறிகள், கீரை, பழங்கள் ஆகியவற்றைச் சேர்த்துக் கொள்வது நல்லது. கொழுப்புச் சத்து அதிகமாக உள்ள உணவைத் தவிர்ப்பதும் நல்லது.

2) உடற்பயிற்சி:

தினமும் சில மைல்கள் நடப்பதும், மிதமான உடற்பயிற்சி செய்வதும் மூளையின் ஆற்றல் குறையாமலிருக்க மிகவும் உதவுகின்றன என்பதை பல ஆராய்ச்சிகள் ஒருமித்துக் கூறுகின்றன. மூச்சுப்பயிற்சிகளும் பெருமளவு உதவுகின்றன என்பது நிரூபிக்கப்பட்டிருக்கின்றது.

3) புதிய முயற்சிகள்:

எப்போதும் வழக்கமான செயல்களையே செய்து கொண்டிராமல் புதிய புதிய முயற்சிகளிலும், செயல்களிலும் ஈடுபடுபவர்கள் மூளை முதுமையிலும் இளமையாகவும் திறனுள்ளதாகவும் இருப்பதாக ஆராய்ச்சிகள் கூறுகின்றன.

4) ஓய்வு:

சுறுசுறுப்பாக இருப்பது போலவே தேவையான அளவு ஓய்வும், உறக்கமும் மூளையின் திறன் குறையாமல் இருக்க மிகவும் அவசியம் என்று ஆராய்ச்சியாளர்கள் கூறுகிறார்கள்.

5) மூளைக்கு வேலை:

மூளைக்கு அடிக்கடி வேலை கொடுங்கள் என்கிறார்கள் ஆராய்ச்சியாளர்கள். குறுக்கெழுத்துப் போட்டிகள், விடுகதைகள், புதிதாக ஏதேனும் கற்றுக் கொள்ள முற்படுதல் ஆகியவை மூளைக்கு முறையாக வேலை தந்து அதன் திறனைத் தக்க வைத்துக் கொள்கின்றன என்று ஆராய்ச்சிகள் கூறுகின்றன.

6) படித்தல்:

புத்தகங்கள் படித்தல் முதுமையில் நல்ல பொழுது போக்கு மட்டுமல்ல அது மூளைக்கும் நல்லது என்று ஆராய்ச்சியாளர்கள் கண்டு பிடித்து இருக்கிறார்கள். எனவே புத்தகங்கள் படிப்பதும் உதவும்.

7) நல்ல பழக்க வழக்கங்கள்:

புகைபிடித்தல் மற்றும் அதிகமாய் மதுவருந்துதல் போன்ற பழக்கங்கள் நாளடைவில் மூளைத் திறனை மழுங்கடிக்கின்றன என்று ஆராய்ச்சி முடிவுகள் தெரிவிக்கின்றன. எனவே தீய பழக்கங்களை விட்டொழித்து நல்ல பழக்க வழக்கங்களை ஏற்படுத்திக் கொள்தல் மிக முக்கியம்.

8) மற்றவை:

அடிக்கடி பயணிப்பது, பொது நிகழ்ச்சிகளில் ஆர்வத்துடன் கலந்து கொள்வது, இசையைக் கேட்பது, அதிகமாய் கவலைப்படாமல், பதட்டப்படாமல் இருப்பது, தியானம் செய்வது போன்றவையும் முதுமையிலும் மூளைத் திறனைக் கூர்மையாக வைத்திருக்க உதவுகிறது என்கின்றன விஞ்ஞான ஆராய்ச்சிகள்.

மேலும் வயதாக வயதாக மனிதன் சில பல செயல்களில் ஈடுபடுவதைப் படிப்படியாகக் குறைத்துக் கொள்வதும், வயதாகி விட்டதால் சில செயல்பாடுகள் முன்பு போல் இருக்க முடியாது என்று நம்ப ஆரம்பிப்பதும் மூளையின் ஆற்றல் குறைய முக்கிய காரணங்கள் என்று ஆராய்ச்சியாளர்கள் நம்புகிறார்கள். எனவே மேற்சொன்ன ஆலோசனைகளைக் கடைபிடித்து, மனதளவில் முதுமையடைந்து விடாமல் இருந்தால் மூளை என்றும் முதுமை அடைந்து விடுவதில்லை, அதன் ஆற்றல் குறைந்து விடுவதில்லை என்பதை நினைவில் இருத்துவோமாக!

-என்.கணேசன்

நன்றி: ஈழநேசன்