பரம(ன்) இரகசியம் தந்த அனுபவங்கள்!

அன்பு வாசகர்களுக்கு,

வணக்கம்.

நான் பெரும்பாலும் என் எழுத்துக்கள் பற்றி தனிப்பட்ட முறையில் எனக்குத் தெரிவிக்கும் கருத்துக்களை வலைப்பூவில் எழுதுவதில்லை.

ஆனால் பரம(ன்) இரகசியம் நாவலை வாங்கி முழுவதுமாகப் படித்து முடித்து விட்டு சிலரும், வலைப்பூவில் சில அத்தியாயங்களைப் படித்து விட்டு சிலரும் தங்களுக்கு வித்தியாசமான வர்ணிக்க முடியாத சிலிர்ப்பும், அசாதாரண உணர்வுகளும் ஏற்பட்டதாக அலைபேசி மூலமாகவும், மின்னஞ்சல் மூலமாகவும் எனக்கு தெரிவித்த அனுபவங்கள் சாதாரணமானதல்ல. அதனால் அந்த அனுபவங்களின் தனி வர்ணனைக்குப் போகாமல் நல்ல அனுபவங்கள் அவர்களுக்குக் கிடைத்திருக்கின்றன என்பதனை மட்டும் பொதுவாகத் தெரிவிக்க விரும்புகிறேன்.

அவர்கள் தெரிவித்த உணர்வுகளில் பல உணர்வுகள் நானும் உணர்ந்தது தான் என்பதாலேயே அவர்கள் சொல்லாமல் விட்டதையும் சேர்த்து என்னால் உணர முடிகிறது.

பரம(ன்) இரகசியம் மிக சுவாரசியமாகப் போகிறது என்பது பெரும்பாலானவர்களின் கருத்து. சில பயனுள்ள செய்திகள் அதில் கிடைத்திருக்கின்றன என்பது சிலரின் கருத்து. அதோடு விசேஷ உணர்வுகளையும் சேர்ந்து பெற்றிருக்கிறோம் என்பது மிகச்சிலரின் அனுபவம். சுவாரசியம் என்று சொன்ன முதல் சாரார்களுக்கு நான் எழுத்தாளன் என்ற முறையில் நன்றியைத் தெரிவித்துக் கொள்கிறேன். செய்திகள் கிடைத்ததாகச் சொன்னவர்களும், விசேஷ உணர்வுகள் உணர்ந்ததாகச் சொன்னவர்களும் ஒரு சென்சிடிவான பக்குவ நிலையில் இருப்பவர்கள். ஒருவர் எதற்குத் தயாராக இருக்கிறாரோ அதை மட்டுமே பெறவோ, உணரவோ முடியும். அதை ஏற்படுத்திய நிமித்தமாக மட்டுமே பரம(ன்) ரகசியம் இருந்திருக்கிறது. அவர்களுக்கு நான் சொல்வதெல்லாம் கிடைத்ததைத் தக்க வைத்துக் கொள்ளுங்கள், இழந்து விடாதீர்கள் என்ற அக்கறை மிகுந்த ஆலோசனையைத் தான்.

(ஒரே ஒரு எச்சரிக்கை. பெற்றதை பெற்றபடியே உணர்வது மிக முக்கியம்.. கற்பனை இதில் சேர்ந்து கொண்டால் உண்மையான நன்மை இருக்காது)

அவர்களுக்குள்ளே ஆழத்தில் இருந்த ஏதோ ஒரு இறையுணர்வைத் தொட்டு எழுப்ப பரம(ன்) இரகசியத்திற்கு முடிந்ததில் எனக்கு பரம திருப்தி. இந்த நாவலை எழுத வைத்த பரமனுக்கு என் சாஷ்டாங்க நமஸ்காரங்கள், ஊக்குவித்த அனைத்து வாசகர்களுக்கும் என் மனமார்ந்த நன்றிகள்.

அன்புடன்
என்.கணேசன்